ع الماشى 5

ماشى على جسر الأمل
شايل همومى فوق كتافى بلا كلل
وانا لسة فى بداية الطريق
بحضن قوى حلمى البرئ
واحزن قوى لو ضاع صديق
كان هو فى الحلم البطل

ع الماشى 4 باين

مع انى فى جمعكم متشال على الأكتاف
بصرخ بأعلى الصوت لكنى مش متشاف
خفت وملانى الخوف من إنى حتى أخاف
معقولة كل اللى فاضلى هتاف

أنا آسف

أنا آسف ... على حاجة ماهش ذنبى

أنا فى حلمى بسيط جداً وعلى قدى

وسامحينى

مانيش فارس على حصانه وليه صولات

ولا فى ايديه سيف مغوار وليه غزوات

أنا شاعر ومن قلبى بعبرلك مع الكلمات

يبان شعرى واحساسى ... واخبى حاجات

فسامحينى

ما حيلتيش غير وفا قلبى

ما حيلتيش غير دفا حبى

ما فيش فى ايديه غير احلام على دربى

وبس خلاص

مادام الكلمة من قلبى بتوصلك

هقولها لك

مادام حساها ومعاها

اعيشهالك

عشان انتى الحياة عندى

وكل ما ليه فى الدنيا

بحبك موت ولو ترضى

تهون الدنيا فى عنيه

فدا عنيكى

أنا آسف ما فيش غير حب

يكفيكى ؟

لغتنا بخيرها (مونولوج)

باى يا جماعة (سى يو) تانى

أحسن (سورى) نانى موعدانى

(آى ويل باى) من بره معانى

وأعوج بيهم نطق لسانى

****

(آى ويل فورجت) نطق العربى

(آى ويل ساى) باللهجة الغربى

(أوو ماى جاد) معناها يا ربى

(سورى ما دير ... يو ) مش فاهمانى

****

(آى وير جينز)  وهبقى خواجة

(آى كيب) أخلاقى فـ تلاجة

(برهابس) دماغى فيها حاجة

فيها تقاليع بايخة وغيظانى

****

والله ده لسة لغتنا بخيرها

ليه فى كلامك تنطق غيرها

هينوبك ايه من تكسيرها

ولاَّ انت ثقافتك تايوانى

أحلامى حساكى

بشوف فى عنيكى أحلامى
وحاسس باللى جواكى
وصاحية ... ولا حتنامى
بشوف الحلم وياكى
****
وحلمى طاف دروب الكون
وشاف حسنك صبح مفتون
ملاه الشوق ... حلف ما يكون
وحيد ... والشوق بيملاكى
****
وتاه حلمى البرئ فيكى
هداه السحر فى عنيكى
وخلَّى الروح تناديكى
والاقى وجودى فى هواكى
****
عنيكى الحسن فيها بحور
وفيها الضىّ أصل النور
وأنا بحُبك بقيت عصفور
باطير من شوقى فى سماكى
****
حنانك شوق مخلينى
أبدِّل خوفى بحنينى
واحتاجلك تحسينى
مدام أحلامى حساكى
****
وينهار عمرى م الأيام
إذا ما قدرت أشوف أحلام
وأشتاق حتى إنى أنام
عشان فى الحلم ألقاكى

نار البعاد

بتطول دروب البعاد ... لو حتى خطواية

فى البعد كل الخطا تتمد جوايه

وأمشى ف دروب الحنين اللى بلا نهاية

وانتى دليل سكتى ... فى سماية نجماية

****

دلينى يا سمرة ... يا أم الجبين قمرة

أمشى الخطا تصرخ... " نار البعاد مرة"

****

شَعرك كما ليلى ... بيروح ... وبيجيلى

وألمح على ضيك ... قلبك يغنيلى

****

أحلم أكون رسام ... ياخدنى سيل أحلام

أرسم على كفوفك ... حنين فى حضن سلام

****

أشتاق ... تحنيلى ..... بس البعاد ويلى

امتى اللقا يسمح ... يا سمرة وتجيلى

ع الماشى (3)

محتاج قوى للفرح يدخل قلبى

رغم إن كل جراحى ... أصلاً ذنبى

أنا بس مليت السواد فى عنيه

وفى حاجة ماسة لفوشيا ... أو للبمبى

ع الماشى (2)

 

الله على الجملة اللى بتطفى لهيبى

جملة ما تتقدرش باللى يكون فى جيبى

قدامها بضعف ... باعترف... وبقول ده عيبى

الجملة هى " الأكل جاهز يا حبيبى"

دعاء

يا رب وفقنى وباركلى قوى

ما انت الكريم وانت الرحيم وانت القوى

خلينى ألجأ لك وأنا قلبى سوى

وابعدنى عن كل السلوك الملتوى

ع الماشى (1)

يا قلبى مالك م الحزن بتعانى

تخلص من الأحزان ... تعود لها تانى

ده الفرح قاللى بسخرية : مالك 

"لونك حزين كدة ليه يا فسوانى"

خطوات يا مصر

خطــوات يا مصـر وتوصلى للغــايات

وواصلوا يا ثوار كسر القيـود والسكــات

هاتولنا بكرة الحر ... نحضن معاه الامنيات

ماعادش فاضل كتير ... دى كلها خطـوات

هامتك وهامتى يا حبيبتى فى السما م الفخر

فخور بمصريتى وانتى العزيزة يا مصر

وبخاف عليكى قوى من أى حركة غدر

آدى الكرامة لاحت وبان لها علامات

اتنفسوا يا شباب عـزة وحرية

وكرامة وعدالة وإرادة شعبية

قولوا فى عشق الوطن ميت ألف أغنية

بلدى ... بحبك قوى ... والرك ع النيات

ألوان ألوان ... (الشعب يريد مزيد من الحنان)

كل لون يا حبيبتى فيكى
اقدر اوصف فيه معانى
يعنى مثلاً:
الحنان اللى فى قلبك ارجوانى
والسماوى ... لون صفاكى مع الأمانى
والجنان اللى فى عقلك ... بتنجانى
....
لما شفتك كان ساعتها قلبى اخضر
بس ليكى اشتاق وحب وقال وعبر
يا حبيبتى بترغمينى أحبك أكتر
لو حسبت سنين غرامك بالثوانى
....
فى السريع البنى قلبى اتشد ليكى
كان سؤالى : ليه أسرنى لون عنيكى؟
والاجابة: ننى بنى ولا بايديه ولا بايديكى.
تسمحيلى يا حبيبتى اتشد تانى
....
قلب اخضر وابتدى بعلاقة وردى
كل همى فى دنيتى ان انتى ترضى
حبى ليكى ع الملأ دايم وأبدى
فين حنانك ؟ ... السؤال ده من حنانى
....
المهم ... قلبك ابيض زى قلب الطيبين
وف عنيكى السود براح يكفى كل القلقانين
يا ملاكى ... انقذينى ... من الأنين
امسحى بايدكى حزنى وكل حاجة مغلبانى

ثورتنا حرة

ثورتنا حرة وطاهرة وعظيمة ونقية

ثورتنا للشرفا مش للحرامية
مش للى نهبوا البلد
بالقصد والنية
جابوا عاليها واطيها
وكأنها تكية
يا مصر يا أمى
محتاج لحنية
يرضيكى إن اللى سرقك
يعيش وأنا ميت
برصاصة فى قلبى ، ورصاصة فى عنيه
عجبى ... أنا ميت ... لكن رصاصه حى
خانى اللى خان البلد
وفتح علىّ النار
وانا اللى كنت بقول ... سلمية ... سلمية
ما تخلينيش احتار ... كفايانا خذى وعار
دم الشهيد شاهد ع المهزلة ديه
ولا عشان ميت ... ابقى ماليش ديه
أنا شهيدك أنا... يا أمى يا وفيه
روحى فداكى يا مصر
قدمتها هدية
يا بلادى ... ردى الندا
من بعد تضحية
حقى يا بلدى أمانة
ردى الحقوق ليه
خلى شباب الأمل
يترحموا عليه
ويجيبوا كل الحقوق
المستخبية
ويعيشوا بكرامة
ويعيشوا حرية
رديلى روحى بقى
يا حرة يا أبية

بعشق ترابك يا وطن

بعشق ترابك يا وطن

شايل همومك فوق كفوفى كما الكفن

لو حتى أموت علشان عيونك واندفن

وانت اللى مخنوق من عصابات الفتن

همه اللى عايزين يبدروا فى أرضك عفن

همه اللى عايزين يحصروك فى متاهات المحن

همه اللى بايعينك وقابضين التمن

همه اللى ماليين قلبى بالخوف والشجن

قوم يا وطن ...

من قبل ما تصيبك بدايات الوسن

انفض ترابك قبل ما يصيبك وهن

ما ينحنيلك غير ولادك فى المحن

طبطب عليهم ... ضمهم ... ده انت الأحن

وانت اللى هامتك عالية على مر الزمن

فى السر انا بعشقك ... وبعشقك فى العلن